عفا الله عن خطا غدر الخناجر والضلوع ابطال..
بسامح و اتركك تحت الظلام لحالك.... لحالك..
دخيلك وفر دموعك ترى هدر الدموع اذلال..
وترى ما في احد يصبر مثل صبري بغربالك..
انا عيب علي انقض كلامي والرجال افعال..
واذا قلت اقطع حبالك تراني بقطع احبالك..
عشان اكسب هدب عينك تجرعت العذاب اشكال..
وليتك ترأف بحالي علشان ارأف بحالك..
مسوي في حياتي شي ما يذكر ولا ينقال..
حشى حتى العدو وهو العدو ما يعمل اعمالك..
تمسيني على الهم وتصبحني على الغربال..
تقلطني فناجيلك وتقصر عني دلالك..
تحملت التعب لالجك وانا حملي يهد جبال..
رحلت من العذاب وما وقفت الا على جالك..
علامك كل ما اجيك متواضع جيتني تختال..
معاك اليا متى بصبر وصبري معك يحلالك..
مثل ما اقبلت لعيونك لزوم تلد لي بقبال..
ومثل ما قد حشمتك حس واحشم قلبي اشوال..
أنا محد بجابرني اساير معك هالمنوال..
ترى لاني تبيع لك ولاني باصغر عيالك..
انا جيت اعشقك نبض ومشاعر ما اعشقك تمثال..
أنا جيت أسكنك وأحياك وابقى فيك وابقالك..
أنا جيت بضمى عاشق تعب يطرد سراب اللال..
أنا جيت استفز رضاك من فرقاك والجالك..
أنا ما همت بك عاقل أنا كنت أعشقك بخبال..
أنا ما كنت أحبك حي أنا كنت أعشقك هالك..
تخيل من كثر ما خاف تلقى للزعل مدخال..
أخاف اخطي على طيفك وادوس برجلي ظلالك..
تبعتك والعرب تتبع رعود البارق الهمال..
وأنا شفت المطر يتبعك في حلك وترحالك..
كأن اللي خلق حسنك خلقني مع جسدك ظلال..
وصرت اقرب جسد يمشي معك بقفاك وقبالك..
أبي قلبك يحس انه فقد بمحبته رجال..
ملكته من هدب عين وخسرت رضاه بهمالك..
صحيح انه الفراق أقسى ولكن الوصال محال..
وأنا صعب علي ارضي غرورك واضعف قبالك..
بعد ما حققت عيني في بعدك للرقاده مال..
أعود للسهر؟؟!! يا خوي فال الله ولا فالك..
ببدل نظرتك فيني واجيلك كل يوم بحال..
بكون اقرب من ثيابك عليك ولا تهيالك..
بلمك وانثرك واجمعك وارجع وانثرك بهمال..
بخونك وازعلك وارضيك وازعل منك وارضالك..
أبرسم بالثرى وجهك وبدفن صورتك بالرمال..
أبشكي للعرب فرقاك واضحك عند عذالك..
أبهديك الوصال فراق وأهديك الفراق وصال..
بسوي مثل ما أشوفك تسوي وافعل أفعالك..
عشان تعرف مين فينا الزعول ومن وسيع البال..
أبيك تذوق فنجالي وأنا بذوق فنجالك..
نصيحة واحتفظ فيها قصر معك الزمن أو طال..
أبي تسمع كلامي زين وتحطه على بالك..
إذا حبك هبال أطفال لك عندي هبال أطفال..
ولا وابشر بعد بهبال حب ما هو بهبالك..
وإذا قصدك تهين اسمي عشان تشمت العذال..
حشى لا أنت ولا غيرك ولا عشره من أشكالك..
